बेल बहादुर परियार : संघर्ष, साधना र लोक संगीतप्रतिको अटुट समर्पण

बर्दिबास, माघ २० ।
लोक तथा दोहोरी संगीतको क्षेत्रमा बेल बहादुर परियार कुनै एक गीत वा एक सफलतामा सीमित नाम होइन । उनी तीन दशकभन्दा बढी समयदेखि लोकधुन, जनभावना र सामाजिक चेतनालाई गीतमार्फत प्रस्तुत गर्दै आएका एक प्रतिबद्ध सर्जक हुन् । पछिल्लो समय सार्वजनिक भएको दोहोरी गीत ‘फूल खसिगो, माया बसिगो’ ले उनको निरन्तर सांगीतिक यात्रालाई फेरि एकपटक उजागर गरेको छ ।

परियारले २०५१ सालमा रेडियो नेपालबाट पहिलोपटक ‘जाग नेपाली वीर नेपाली’ गीत गाएसँगै औपचारिक रूपमा गायन यात्राको सुरुवात गरेका थिए । त्यसयता उनले लोक, जनवादी तथा सांस्कृतिक चेतनासँग जोडिएका थुप्रै गीतमार्फत आफ्नो पहिचान बनाउँदै आएका छन् । ‘सिन्धुलीका सुसेलीहरू’, ‘गरौं है रमाइलो’ (देउसी गीत), ‘मिठो सम्झना’ (तीज गीत), ‘सुनको थैली चाँदीको झुम्कना’ जस्ता गीतहरू उनको सिर्जनात्मक यात्राका महत्वपूर्ण कडी हुन् ।
लोक संगीतमा निरन्तर सक्रिय रहँदा परियारले संघर्ष र अभाव दुवै भोगेका छन् । सीमित प्रचार, कमजोर बजार र अवसरको असमानताबीच पनि उनले आफ्नो बाटो परिवर्तन गरेनन् । जनभावना, माटोको सुगन्ध र मौलिकताको पक्षमा उभिएर गीत सिर्जना गर्नु नै उनको पहिचान बनेको छ ।

हाल राष्ट्रिय लोक तथा दोहोरी गीत प्रतिष्ठान नेपाल, महोत्तरीको अध्यक्षको जिम्मेवारी सम्हालिरहेका परियारले संस्थागत रूपमा पनि लोक संगीतको संरक्षण र प्रवर्द्धनमा भूमिका खेल्दै आएका छन् । स्थानीय कलाकारलाई मञ्च, पहिचान र अवसर दिलाउने अभियानमा उनी सक्रिय छन् ।

हालै बर्दिबासमा विमोचित ‘फूल खसिगो, माया बसिगो’ गीतमा परियार स्वयंको शब्द र संगीत रहेको छ भने गायनमा प्रतिमा अर्यालसँग सहकार्य गरेका छन् । आधुनिक एरेञ्ज र लोक भावको संयोजनमार्फत उनले नयाँ पुस्तासम्म पुग्ने प्रयास गरेका छन्, तर लोक संगीतको मौलिकता भने नछोड्ने उनको अडान स्पष्ट देखिन्छ ।

गीत विमोचनका क्रममा परियारले आफूलाई स्थापित बनाउनेभन्दा पनि लोक संगीतलाई जोगाउने उद्देश्य प्राथमिक भएको बताए । उनले स्रष्टाले सिर्जनालाई माया गर्ने दर्शक–श्रोताको साथबिना कुनै पनि यात्रा सम्भव नहुने भन्दै युवा पुस्तालाई लोक संगीततर्फ आकर्षित गर्न सबैको सहकार्य आवश्यक रहेको धारणा राखे ।

संघर्ष, साधना र समर्पणको संगम बनेका बेल बहादुर परियार आज पनि नयाँ सिर्जनाको खोजीमा छन् । बदलिँदो समय र प्रविधिसँगै लोक संगीतलाई कसरी जोगाउने भन्ने प्रश्नसँगै उनी आफ्ना गीतमार्फत समाजसँग संवाद गरिरहेका छन् । ‘फूल खसिगो, माया बसिगो’ जस्तै सिर्जनाले उनको यात्रालाई अझ मजबुत बनाउने अपेक्षा गरिएको छ ।

गीतको लिङ्क :
https://youtu.be/EXUnaiSIqC8?si=uj3RY3q9Bs1WHRwq